Prorektoru öldürən şəxs 12 il sonra saxlanıldı

Təfəkkür Universitetinin prorektorunu öldürməkdə şübhəli bilinən şəxs 12 il sonra müəyyən edilib. Bu barədə Baş Prokurorluq və Daxili İşlər Nazirliyi birgə məlumat yayıb.

Məlumata görə, Baş Prokurorluq və Daxili İşlər Nazirliyinin əməkdaşlarından ibarət peşəkar istintaq-əməliyyat qrupu tərəfindən həyata keçirilən tədbirlər nəticəsində 12 il əvvəl törədilərək bağlı qalan xüsusilə ağır cinayətin açılması təmin edilib.

Belə ki, 2011-ci il sentyabrın 16-da 1942-ci il təvəllüdlü Tariyel Əhmədovun yaşadığı binanın yaxınlığında üzərində xəsarət izləri olan meyitin aşkar edilməsi faktına görə Cinayət Məcəlləsinin müvafiq maddələri ilə cinayət işi başlanıb, istintaq aparılsa da, cinayəti törətmiş şəxsi müəyyən etmək mümkün olmadığından iş üzrə icraat dayandırılıb.

Baş Prokurorluğun İstintaq idarəsi tərəfindən cinayət işi yenidən öyrənildikdən sonra iş üzrə icraat təzələnib. Həyata keçirilən çoxsaylı intensiv istintaq-əməliyyat tədbirləri nəticəsində əldə edilmiş sübutlarla 1977-ci il təvəllüdlü Dəyanət Quliyevin tamah məqsədilə Tariyel Əhmədova küt alətlə xəsarətlər yetirərək, qəsdən öldürməsinə əsaslı şübhələr müəyyən edilib.

Dəyanət Quliyev iş üzrə 2023-cü il aprelin 27-də Cinayət Məcəlləsinin tamah məqsədilə qəsdən adam öldürmə maddəsi ilə təqsirləndirilən şəxs qismində cəlb edilərək barəsində məhkəmənin qərarı əsasında həbs qətimkan tədbiri seçilib.