Qatar relsdən çıxaraq aşdı

Bakı-Tbilisi-Qars dəmir yolu xəttinin Gürcüstanın Tsalka rayonundan keçən seksiyasında texniki xidmət qatarı relsdən çıxaraq aşıb.

Mayın 26-da baş vermiş qəza nəticəsində 1 nəfər – Salyan rayon sakini, maşinist köməçisi kimi çalışan 40 yaşlı Sadıqov Ruslan Ramiz oğlu dünyasını dəyişib, daha 3 nəfər isə xəsarət alıb.

Qeyd edək ki, ölən şəxslə yanaşı, xəsarət alanların da Azərbaycan vətəndaşları olduğu bildirilir.

“Gürcüstan Dəmir Yolları” xidmətinin açıqlamasına görə, dəmir yolu xəttinin sözügedən seksiyasındakı tikinti işləri “Azərbaycan Dəmir Yolları” şirkəti tərəfindən aparılır.

“Azərbaycan Dəmir Yolları” QSC də baş vermiş hadisə ilə bağlı məlumat yayıb. Qeyd edilib ki, Bakı-Tbilisi-Qars dəmir yolu xəttinin Gürcüstan ərazisindən keçən sərt aşırımlı Trialeti-Tsalka mənzilində aparılan təmir-bərpa işləri zamanı hərəkətdə olan manevr teplovozunun qəfil relsdən çıxması nəticəsində “Azərbaycan Dəmir Yolları” QSC-nin Gürcüstan filialının bir nəfər əməkdaşı, maşinist köməkçisi dünyasını dəyişib. Manevr teplovozunun digər ekipaj üzvlərinin səhhəti isə normaldır, əlavə xəsarət alan olmayıb. Hazırda hadisənin baş vermə səbəbləri araşdırılır.