Qazaxda 31 yaşlı şəxs içki üstündə qətl törətdi

Qazaxda bir neçə gün əvvəl qohumlar arasında düşən mübahisə qanlı sonluqla nəticələnib.

Hadisə rayonun Qazaxbəyli kəndi ərazisində Yeni Qəsəbə adlanan yaşayış massivində qeydə alınıb. 31 yaşlı Rəşad Məhərrəmov qohumu 28 yaşlı Kənan Qəfərovu qətlə yetirib.

İlkin məlumata görə, mübahisə bir həftə əvvəl qəsəbə ərazisində yerləşən kafelərin birində spirtli içgi süzmək üstündə başlayıb . Mübahisə zamanı Kənan Qəfərov əvvəlcə Rəşad Məhərrəmovu bıçaqlayıb.

Yüngül xəsarət alan Rəşad Məhərrəmov yarası sağaldıqdan sonra Kənanı aralarındakı mübahisəyə aydınlıq gətirmək üçün həyətə çağırıb. Münaqişə zamanı bu dəfə Rəşad qohumu Kənanı qarnından bıçaqlayaraq qətlə yetirib.

Cinayəti törətməkdə şübhəli bilinən Rəşad Məhərrəmov polisin keçirdiyi əməliyyat tədbirləri nəticəsində saxlanılıb. Faktla bağlı cinayət işi açılıb, araşdırma aparılır.