Qətl törətməkdə təqsirləndirilən şəxslərə ağır cəza verildi - Baku TV

Bakıda xuliqanlıq və qətl törətməkdə ittiham olunan Afiq Hacıəliyev və Natiq İmamcanovun cinayət işi üzrə məhkəməsi yekunlaşıb.

Bakı Ağır Cinayətlər Məhkəməsində hakim Eldar İsmayılovun sədrliyi ilə keçirilən prosesdə təqsirləndirilən şəxslərin vəkilləri müdafiə çıxışları ediblər. Daha sonra hökm elan edilib. Hökmə əsasən, Afiq Hacıəliyev 14 il, Natiq İmamcanov 3 il müddətinə azadlıqdan məhrum edilib.

Natiq İmamcanov barəsində seçilmiş qətimkan tədbiri dəyişdirilərək həbs qətimkan tədbiri ilə əvəz olunub. O, məhkəmə zalında həbs olunub.

Xatırladaq ki, dövlət ittihamçısı İsmayıl Cavadlı məhkəməyə təqsirləndirilənlərdən Afiq Hacıəliyevin 18 il 6 ay, Natiq İmamcanovun isə 4 il müddətinə azadlıqdan məhrum edilməsini təklif etmişdi.

Qeyd edək ki, hadisə 2025-ci ilin martında paytaxtın Suraxanı rayonu ərazisində baş verib. Afiq Hacıəliyev mübahisə zəminində tanışı Turan Əliyevə bıçaqla xəsarət yetirərək, öldürməkdə təqsirləndirilib. Hadisə günü Afiq Hacıəliyevlə birlikdə olan tanışı Natiq İmamcanov da təqsirləndirilən şəxs qismində cinayət məsuliyyətinə cəlb olunub.

Afiq Hacıəliyevə qarşı Cinayət Məcəlləsinin 120.2.4-cü (xüsusi amansızlıqla qəsdən adam öldürmə), Natiq İmamcanova isə 221.3-cü (xuliqanlıq, silah və ya silah qismində istifadə olunan əşyalarla törədildikdə) maddələri ilə ittiham irəli sürülüb.