"17 uşaq orada..." | Sel fəsadlara səbəb oldu: "Körpülərimizi, sahələrimizi apardı" - Baku TV

Yağan leysan yağışları Şabranda bir sıra fəsadlara səbəb olub. Şabrançay və Dəvəçi çayına gələn sel suları kənd sakinlərinə ciddi ziyan vurub.

Sakinlərin sözlərinə görə, sel nəticəsində körpülər dağılıb, kənddaxili yollar yararsız vəziyyətə düşüb, geniş ərazilər suyun təsiri ilə yuyulub aparılıb.

“Gələn sellər bizə böyük tələfatlar verdi. Körpülərimizi apardı. Müvəqqəti qoyulan yardımçı körpülər də sel sularının təsirindən dağıldı. Sotlarla, hətta hektarlarla torpaq kəndin içərisindən yuyulub aparılıb. Kəndimizin gələcəyi təhlükə altındadır. Sel qaz borularını da dağıdıb aparıb. Əhalinin böyük əksəriyyəti qazsız qalıb. Körpə uşaqlarımız var, soyuqdan əziyyət çəkirlər”, – sakinlərdən biri bildirib.

Digər sakin isə qeyd edib ki, Dəvəçi çayına gələn sel onun həyətinə də ciddi ziyan vurub:

“Sel həyətimdəki ağacların yarısını demək olar ki, yığıb aparıb. Ağaclar hazırda çayın içindədir. 17 uşaq o tayda qalıb, məktəbə gedə bilmirlər. Çıxılmaz vəziyyətdəyik. Mənə dəyən ziyan 12–15 min manat arasındadır”.