"Keçən il müəmmalı şəkildə evimiz yandı" | Zaqatalada torpaq ədavəti yanğınla nəticələndi

Zaqatala rayonunun Bəhmətli kəndində yanğın baş verib.

Kənd sakini, 32 yaşlı Araz Ərşadoğluna məxsus evin həyətyanı sahəsində yerləşən, ümumi sahəsi 12 kvadratmetr olan yardımçı tikili yanıb.

Məlumata görə, zərərçəkən Araz Ərşadoğlu ilə əmisi, 61 yaşlı İlham Məmmədov arasında uzun müddətdir torpaq sahəsinə görə mübahisə gedir. İlham Məmmədovun da bu səbəbdən qardaşı oğluna məxsus yardımçı tikilini yandırdığı bildirilir.

“8 ildir aramızda münaqişə gedir. Keçən il müəmmalı şəkildə evimiz yandı, onu da İlham Məmmədov etmişdi. Mən bu adamdan şikayətçiyəm. Dünən axşam da buranı yandırdı, bir neçə gün əvvəl isə şiferləri sındırmışdı. Hər şey göz qabağındadır. Gəlib özü dedi ki, mən yandırmışam, mən bilərəm”, – deyə ev sahibi bildirib.

Daxili İşlər Nazirliyindən verilən məlumata görə, Zaqatala rayonunun Bəhmətli kəndi ərazisində vətəndaşa məxsus yarım tikilini qəsdən yandırmaqda şübhəli bilinən şəxs polis əməkdaşlarının həyata keçirdikləri tədbirlərlə saxlanılıb. Faktla bağlı araşdırmalar davam etdirilir.

Qeyd edək ki, hadisə yerinə cəlb olunan Zaqatala Rayon Dövlət Yanğından Mühafizə Hissəsinin əməkdaşları yanğını qısa müddətdə söndürüb. Hadisənin başvermə səbəbləri araşdırılır.