"Xəstəxanaya çatdırıldı, amma..." | Gəncədə 18 yaşlı tələbənin ölümü ilə bağlı açıqlama - Baku TV

Gəncədə peşə məktəbinin tələbəsi həyatını itirib. Hadisə yanvarın 12-də səhər saatlarında Sənaye və Texnologiyalar üzrə Gəncə Dövlət Peşə Təhsil Mərkəzində qeydə alınıb.

Mərkəzin 18 yaşlı tələbəsi Röyal Bayramovun halı pisləşib, o, huşunu itirərək yerə yıxılıb.

Hadisə yerinə təcili tibbi yardım briqadası cəlb olunsa da, tələbənin həyatını xilas etmək mümkün olmayıb.

Respublika Təcili və Təxirəsalınmaz Tibbi Yardım Mərkəzinin və Gəncə Şəhər Birləşmiş Xəstəxanasının məlumatına görə, saat 08:50 radələrində daxil olan çağırış əsasında həmin ünvana dərhal təcili tibbi yardım briqadası göndərilib. Təcili tibbi yardım briqadası tərəfindən 2008-ci il təvəllüdlü şəxsin həkimə qədər ölüm faktı qeydə alınıb.

Ətrafdakıların təkidi ilə saat 09:10 radələrində Abbas Səhhət adına xəstəxanaya hospitalizasiya həyata keçirilib. Həkim heyəti tərəfindən həkimə qədər ölüm faktı təsdiqlənib və meyit aidiyyəti üzrə təhvil verilib.

Faktla bağlı Gəncə Şəhər Prokurorluğunda araşdırma başlanılıb.