Qusarda güclü partlayış | 1 nəfər ağır yaralandı

Qusarın Hil kəndində yaşayış evində partlayış baş verib. Nəticədə ev yanaraq külə dönüb.

Güclü partlayış evin mətbəx hissəsində baş verib, bir anda tikilini alov bürüyüb. 30 yaşlı Faiq Abdullayev isə ağır yanıq xəsarətləri alıb.

“Saat 3-ə işləmişdi, zəng gəldi ki, qonşunun evi yanıb. Gəlib gördüm, uşaq bayıra çıxıb, əli, qolu, başı yanıb. Mətbəxdə kofe qaynadırmış, dağılıb. Ondan sonra partlayış baş verib”, – xəsarət alan şəxsin qonşusu deyib.

Xəstəxanadan bildirilib ki, hadisə nəticəsində Abdullayev Faiq 2-ci, 3-cü dərəcəli termiki yanıq xəsarətləri alıb. Başın, boyunun, ətrafların termiki yanığı olub. Xəstəyə zəruri tibbi yardımlar göstərildikdən sonra vəziyyəti stabilləşib.

Yanğının dəqiq səbəbləri ilə bağlı araşdırma aparılır.