Şabranda evin tavanı çökdü: Xəsarətalan var - Baku TV

Şabranda mənzilin tavanı çöküb.

Hadisə şəhərin dəmir yolu stansiyası ətrafında yerləşən ikimərtəbəli çoxmənzilli binalardan birində baş verib. Mənzilin tavan hissəsinin sakinlərin üzərinə çökməsi nəticəsində bir neçə nəfər yüngül xəsarətlər alıb.

Zərərçəkən Məleykə Hüseynova bildirib ki, hadisə səhər saatlarında qəfil baş verib:

“Səhər saatlarında birdən-birə tavan çökdü. Evin içində dumandan bir-birimizi görə bilmirdik. Qapı açılmırdı, qonşular səsimizi eşidib bizi dartıb çıxardılar”.

Şabran Rayon İcra Hakimiyyətindən verilən məlumata görə, hadisə istismar müddəti başa çatan binalardan birində qeydə alınıb. Bildirilib ki, bina İcra Hakimiyyətinin balansında olmasa da, əvvəlki illərdə burada təmir işləri aparılıb:

“Hadisə ilə əlaqədar rayon Fövqəladə Hallar Komissiyası tərəfindən binaya baxış keçiriləcək, ailəyə köməklik göstərilməsi məqsədilə müvafiq qurumlara müraciət ediləcək”.

Faktla bağlı araşdırma aparılır.