Saxtakarlıq edən vəzifəli şəxslərə cinayət işi açıldı | Hadisənin detalları üzə çıxdı

Astarada saxta sənədlər təqdim etməklə 2016-cı ildən aliment alan şəxs və qanunsuz əməllərinə görə vəzifəli şəxslər barədə cinayət işi açılıb.

Bu barədə Baş Prokurorluqdan verilən məlumatda bildirilir.

Astara rayonunun Kakalos Ailə Sağlamlıq Mərkəzi və Lənkəran rayon Mamusta Ailə Sağlamlıq Mərkəzinin vəzifəli şəxslərinin qanunsuz əməlləri barədə daxil olmuş müraciət əsasında rayon prokurorluğunda araşdırma aparılıb.

Araşdırma zamanı həmin mərkəzlərin vəzifəli şəxsləri tərəfindən Astara sakini Könül Ağayevanın guya 2016-cı ildə uşaq dünyaya gətirməsinə dair rəsmi tibbi sənədlərə bilə-bilə yalan məlumatların daxil edilməsi müəyyən edilib. Bunun əsasında Könül Ağayeva mövcud olmayan uşağa dair qanunsuz olaraq şəhadətnamə və şəxsiyyət vəsiqəsi əldə edib və qeyd olunan saxta sənədlərdən istifadə etməklə məhkəmə qətnaməsi əsasında xeyrinə aliment tutulub.

Faktla bağlı Astara rayon prokurorluğunda Cinayət Məcəlləsinin 313 (vəzifə saxtakarlığı) və 320.2-ci (rəsmi sənədləri, möhürləri, ştampları, blankları saxtalaşdırma, qanunsuz hazırlama və istifadə etmə) maddələri ilə cinayət işi açılıb. Hazırda ibtidai istintaq davam etdirilir.