Şəkidə güclü külək və leysan rabitə xətlərinə ziyan vurdu

Son günlər Şimal-qərb bölgəsində davam edən qeyri-sabit hava şəraiti Şəkidə fəsadlara səbəb olub.

Güclü külək ağacları aşırıb, elektrik şəbəkəsinə ziyan vurub. Yağış suları asfalt örtüyünü sıradan çıxarıb.

Küləkli və yağıntlı hava Şəkidə şəhər ərazisində yol infrastrukturuna, işıq dirəklərinə, şəxsi təsərrüfatlara ziyan vurub.

Səhər saatlarında Calğalıbulaq, Sabit Rəhman, 20 Yanvar, Aydın Məmmədov və Rasim Ocaqov küçələrində ağaclar aşıb. Nəticədə ətrafdakı elektrik və rabitə xətlərinə ciddi ziyan dəyib.

Həmçinin yağış suları bir sıra küçələrdə asfalt örtüyünü yuyub, bəzi yerlərdə isə yol çöküb.

Fəsadların aradan qaldırılması istiqamətində işlər davam etdirilir.