Şok hadisənin ifşası | Kafel yapışdırıcısı adı ilə görün nələri daşımaq istədilər

Astara Gömrük İdarəsinin əməkdaşları tərəfindən kompleks əməliyyat-axtarış və nəzarət tədbirləri həyata keçirilib.

Nəticədə Avropaya daşınması nəzərdə tutulan külli miqdarda narkotik vasitə – heroin aşkar edilib.

Bu barədə Dövlət Gömrük Komitəsindən məlumat verilib. Sözügedən vasitələr qanunsuz dövriyyədən çıxarılıb.

Belə ki, Azərbaycan ərazisindən tranzit keçməklə İrandan Estoniyaya “kafel yapışdırıcısı” yükü aparan vaqon “Astara Dəmir Yolu” gömrük postunda saxlanılıb. Yüklərə stasionar rentgen qurğusunda baxış keçirilib.

Baxış zamanı şübhəli cizgilər müşahidə olunub. Nəticədə, yükə kinoloji xidmət iti vasitəsilə əsaslı gömrük yoxlaması tətbiq edilib.

Kinoloji xidmət itinin reaksiyasından sonra aparılan yoxlama zamanı 3250 ədəd kisədən 44-də xüsusilə külli miqdarda, qablaşdırmaları ilə birlikdə ümumi təqribi çəkisi 456 kq 800 qram olan narkotik vasitə – heroin aşkar edilib.

Qeyd edək ki, aşkar edilən narkotik vasitənin Avropa qara bazarında təqribi pərakəndə satış qiyməti 90 milyon ABŞ dollarından yuxarıdır.