Sürücünün hərəkəti qəzanı qaçınılmaz etdi | Bakıdakı hadisə barədə NİİM-dən xəbərdarlıq

Texniki nasaz avtomobilin yolun orta zolağında qalması, təhlükəsizlik tədbirlərinin görülməməsi və ara məsafəsinin saxlanılmaması yol-nəqliyyat hadisəsinin baş verməsinə səbəb olub.

Nəqliyyatı İntellektual İdarəetmə Mərkəzinin İctimaiyyətlə əlaqələr sektorunun müdiri Ömər Xıdırov bildirib ki, paytaxtın Nizami rayonu, Heydər Əliyev prospekti, “Koroğlu” metrostansiyasının yaxınlığında baş verən bu qəzadan sürücülər nəticə çıxarmalıdır.

Onun sözlərinə görə, prospektdən mərkəz istiqamətində hərəkət edən “Qazel” markalı yük avtomobilində texniki nasazlıq yaranıb və sürücü belə məqamda “Yol hərəkəti haqqında” qanunun 55-ci maddəsinin müvafiq bəndlərini əsas götürmək əvəzinə, avtomobildə yaranan nasazlığı həll etməyə çalışıb. Nəticədə yolda hərəkət edən digər nəqliyyat vasitələri üçün qəza şəraiti yaranıb və digər sürücünün ara məsafəsi saxlamaması da yol-nəqliyyat hadisənin baş verməsini qaçılmaz edib:

“Mərkəzin müşahidə kameralarının qeydə aldığı görüntülərin təhlilləri onu deməyə əsas verir ki, hərəkət zamanı nəqliyyat vasitəsində texniki nasazlıq yarandıqda bəzi sürücülər təhlükəsizlik qaydalarına riayət etmirlər.

Avtomobildə texniki problem yarandıqda nəqliyyat vasitəsi yolun hərəkət hissəsindən kənara çəkməli, qəza işıqları yandırılmalı və xüsusi nişandan istifadə edilməlidir”.