Ucarda canavar sürüsü kəndə hücum etdi | Kənd sakini hadisədən danışdı - Baku TV

Ucarın Qazyan kəndində canavar sürüsü kənd sakini Kifayət Babayevanın təsərrüfatındakı 23 baş xırdabuynuzlu heyvandan səkkizini tələf edib, 15-ni isə ağır yaralayıb.

Ev sahibinin sözlərinə görə, heyvanlar həyət sahəsində nəzarətsiz qalıb. Nəticədə, yırtıcılar fermerə ümumilikdə 8 min manata yaxın ziyan vurub.

Kənd sakinləri bildirirlər ki, son vaxtlar ərazidə canavarların sayı artıb və onlar tez-tez kənd ətrafında sürü halında görünürlər. Bu isə əhali arasında ciddi narahatlıq yaradıb.

Hazırda sakinlər aidiyyəti qurumlardan təhlükəsizlik tədbirlərinin gücləndirilməsini tələb edirlər.

Məsələ ilə bağlı Ucar Heyvan Sağlamlığı Baytarlıq Xidmətindən bildirilib ki, əraziyə baxış keçirilib, 8 baş xırdabuynuzlu heyvanın öldüyü, 15 baş heyvanın isə yaralandığı müəyyən edilib. Ölən heyvanların cəsədləri basdırılıb. Tövlələr və heyvanların basdırıldığı ərazi dezinfeksiya olunub. Yaralı heyvanlara baytarlıq yardımı göstərilərək nəzarətə götürülüb.