Uşağın əlini cırmışdı... | 248 nömrəli məktəbdə rüşvət iddiası

Sosial şəbəkələrdə 248 nömrəli məktəbin direktor və direktor müavininin dərs saatlarını pul qarşılığında satması, dərsə gəlməyən şagirdlərdən 1500-2000 manat məbləğində pul tələb etməsi, eyni zamanda attestatları 20-30 manat məbləğində satması ilə bağlı iddialar yayılıb.

Deyilənlərin nə dərəcədə həqiqətə uyğun olub-olmadığını öyrənmək üçün Baku TV sözügedən məktəbdə olub.

Məktəbin direktor müavini Saleh Quliyev bildirib ki, yayılan iddialar keçmiş əməkdaşlarla bağlıdır:

“Nərgiz Məmmədova dərs zamanı müəllimə yaraşmayan hərəkətlər etmişdi. 1-2 uşağa fiziki şiddət göstərmişdi, uşağın əlini cırmışdı. Onunla əlaqədar təxminən üç il əvvəl öz ərizəsi ilə işdən uzaqlaşdırılıb. Deyilənə görə, keçmiş direktor pis vəziyyətdə işindən kənarlaşdırıldığına görə Nərgiz müəllimənin ruhi sarsıntılarından istifadə edib, saxta səhifə açaraq məktəbə böhtan atıb”.

Bakı Şəhəri üzrə Təhsil İdarəsindən məsələyə münasibət bildirilib. Qurumdan verilən açıqlamada qeyd olunub ki, 248 nömrəli tam orta məktəbin rəhbərliyi ilə bağlı irəli sürülən anonim iddialar həqiqəti əks etdirmir.