“Yıxdı altına, başladı sökməyə...” | Ayının hücum etdiyi sakin yaşadıqlarını danışdı

Naxçıvan Muxtar Respublikasının Babək rayonunun Yuxarı Buzqov kənd sakinləri olan ata və oğul oktyabrın 19-da ayı hücumuna məruz qalıb.

Hadisə kənd sakini Məzahir Məmmədovun oğlu ilə birlikdə meşəlik ərazidə giləmeyvə yığdığı vaxt baş verib.

Ayı hücumu zamanı xəsarət alaraq xəstəxanaya yerləşdirilən zərərçəkən hadisənin qəfil baş verdiyini deyib:

"Ayını görəndə döndüm ki, qaçım, amma ayağım daşa ilişdi, yıxıldım. Bu zaman ayı üstümə atıldı. Can şirindir, başladıq boğuşmağa. Oğluma tərəf gedəndə, nə fikirləşdisə, qayıdıb getdi".

Zərərçəkənin oğlu isə bildirib ki, ayının onlara necə yaxınlaşdığını hiss etməyiblər:

"Gördüm yuxarıdan itlər gəlir. Sən demə, ayı da onların arxasınca gəlirmiş. Səs eşitdikdən sonra kolların arasından qonur bir şeyin keçdiyini gördüm. Atam qaçmaq istəyəndə yıxıldı və ayı ona hücum etdi".

Zərərçəkənin yerləşdirildiyi xəstəxananın həkimi Amin İsmayılov yaralının vəziyyətinin yaxşı olduğunu deyib:

"Xəstənin gövdə nahiyəsində, hər iki aşağı və yuxarı ətraflarında, əl biləklərində deşilmiş, cırılmış yaralar olub. İlkin tibbi yardım göstərilib, stasionar müalicəsinə başlanılıb. Vəziyyəti qənaətbəxşdir".