22-ci turun “Qarabağ” - “Sabah” görüşündə 6 qol vuruldu

Azərbaycan çempionatında 22-ci tura start verilib. Mərkəzi matçda son çempion “Qarabağ” komandası “Sabah”la üz-üzə gəlib.

Tofiq Bəhramov adına Respublika stadionunda keçirilən görüşdə 6 qol vurulsa da, qalib müəyyənləşməyib. Maraqlıdır ki, bu toplardan ilk 4-ü penaltidən vurulub. “Köhlən atlar”dan Marko Yankoviç və Juninyo 11 metrlik cərimə zərbəsini dəqiq yerinə yetirib. “Bayquşlar”dan isə hər 2 epizodda İshak Belfodil qapını dəqiq nişan alıb: 2-2.

Qarşılaşmanın əsas vaxtına artırılan dəqiqələrdə tərəflər hərəyə daha 1 qol vurublar. Ağdamlıların heyətində Yassin Benzia, qonaqlardan isə Tellur Mütəllimov fərqlənib.

Bu nəticədən sonra 51 xalı olan “Qarabağ” liderliyini davam etdirir. “Sabah” isə 5-ci pillədədir.

Qeyd edək ki, “Qarabağ” növbəti turda “Sumqayıt”la, “Sabah” isə “Kəpəz”lə qarşılaşacaq.