AVRO 2024-ün ev sahibi Almaniya millisi baş məşqçisiz qaldı

Almaniya millisinin baş məşqçisi Hansi Flik vəzifəsindən qovulub. Buna komandanın son oyunlardakı uğursuz nəticələri səbəb olub.

AVRO-2024-ün ev sahibi kimi seçmə mərhələdə iştirak etməyən “bundestim”, yoxlama matçlarında inamsız çıxış edir.

Belə ki, sentyabrın 9-u Yaponiya yığmasına 1-4 hesablı məğlubiyyətdən sonra Almaniya millisinin qələbəsiz seriyası 5 oyuna yüksəlib. Uğursuz nəticələr, eləcə də Yaponiya komandasına ağır məğlubiyyət Almaniya Futbol Federasiyasının Hansi Fliki istefaya göndərməsinə səbəb olub. Onun vəzifəsini müvəqqəti olaraq Rudi Föller icra edəcək.

Qeyd edək ki, 2021-ci ilin iyulundan “bundestim”ə rəhbərlik edən Hansi Flikin dövründə Almaniya seçməsi 25 oyun keçirib. 12 dəfə qələbə qazanan kollektiv, 7 görüşdə heç-heçə edib, 6 dəfə isə uduzub.