AVRO-2024 | Xorvatiya - İtaliya matçı

AVRO-2024-ə uğursuz başlayan Xorvatiya millisi B qrupunun son turunda İtaliya kollektivi ilə qarşılaşıb.

Leypsiq şəhərində keçirilən görüşün ilk hissəsində meydanda gərgin mübarizə gedib. Bununla belə, fasiləyədək tərəflər fərqlənə bilməyiblər.

54-cü dəqiqədə isə xorvatlar penalti qazanıblar. Ancaq Luka Modriçin zərbəsini Canluici Donnarumma dəf edib. Lakin cəmi 1 dəqiqə sonra 38 yaşlı Modriç səhvini düzəldərək komandasının hücumunu qolla tamamlayıb.

Buraxılan topdan sonra “Skuadra Adzurra” təzyiqi artırıb. İtaliya seçməsinin səyləri əsas vaxta artırılan dəqiqələrdə nəticə verib. Mattia Zakkanyi apenninliləri məğlubiyyətdən xilas edib.

1-1 hesabı ilə bitən matçdan sonra xallarının sayını 4-ə çatdıran İtaliya B qrupunu 2-ci pillədə tamamlayaraq 1/8 finala yüksəlib. 2 xalı olan Xorvatiya isə qrupda 3-cü olub.