Avropa Liqasında yarımfinala yüksələn komandalar məlumdur

UEFA Avropa liqasında 1/4 finalın cavab matçları keçirilib.

Mərhələnin ən gözlənilməz nəticəsi “Liverpul”un yarışla vidalaşması olub.

İngiltərədəki ilk görüşdə “Atalanta”ya 0-3 hesabı ilə uduzan “qırmızılar” İtaliyada ancaq 1 qol vurublar. Sərfəli nəticəni qoruyan Berqamo təmsilçisi yarımfinala yüksəlib.

“Bayer” də 4 ən güclü kollektiv arasına vəsiqə qazanıb. 1-ci oyunda “Vest Hem”ə 2-0 hesabı ilə qalib gələn leverkuzenlilər 13-cü dəqiqədə hesabda geriyə düşsələr də, görüşün sonlarında Frimponq komandasını məğlubiyyətdən xilas edib. Beləliklə, 2 matçın yekununda 3-1 hesabı ilə güclü olan “Bayer” növbəti mərhələyə adlayıb.

İtaliya təmsilçiləri “Milan” və “Roma” arasında mübarizə də gərgin alınıb. İlk matçda 1-0 hesablı qələbə qazanan “calorossi” bu dəfə də azarkeşlərini sevindirib. “Canavarlar” 12-ci və 22-ci dəqiqələrdə Canluka Mançini və Paulo Dibalanın qollarından sonra 2-0 hesablı üstünlük əldə etsə də, yarımsaatın tamamında qırmızı vərəqə alan Zeki Çelik komandasını çətin vəziyyətdə qoyub. Lakin “Milan” dönüş edə bilməyib. “Rossoneri”nin gücü ancaq Matteo Qabbiyanın təsəlli topuna çatıb. “Roma” – “Milan”: 2-1.

“Marsel” – “Benfika” cütünün qalibi isə penaltilər seriyasında məlum olub. Oyunun əsas vaxtı Mumbanyanın qolu sayəsində 1-0 hesabı ilə bitib. Tərəflər arasında ilk qarşılaşmada Portuqaliya klubu 2-1 hesabı ilə qalib gəldiyi üçün əlavə vaxta ehtiyac yaranıb. Burada qol olmadığından 11 metrlik zərbələrə müraciət olunub. Penaltilərdə isə “Marsel” futbolçuları dəqiq olublar.

Beləliklə, Avropa liqasında yarımfinal cütləri bu cür müəyyənləşib: “Roma” “Bayer”ə, “Marsel” isə “Atalanta”ya rəqib olub.

Qeyd edək ki, mərhələnin ilk matçları mayın 2-si, cavab oyunları isə mayın 9-da olacaq.