Bakıda şahmat üzrə Dünya Kubokunun açılış mərasimi keçirildi

Paytaxtımızda şahmat üzrə Dünya Kubokuna həsr olunan açılış mərasimi keçirilib.

Bakı Konqres Mərkəzində təşkil olunan tədbirdə Beynəlxalq Şahmat Federasiyasının prezidenti Arkadi Dvorkoviç, Azərbaycan Şahmat Federasiyasının prezidenti, FIDE-nin vitse-prezidenti Mahir Məmmədov, gənclər və idman naziri Fərid Qayıbov, federasiya rəsmiləri, idman ictimaiyyətinin nümayəndələri və şahmatçılar iştirak ediblər.

Açılışa şahmat fiqurlarının formasında paltar geyinən personajların maraqlı səhnəciyi ilə start verilib. Ardınca Azərbaycanın Respublikasının Dövlət Himni səsləndirilib və şahmatın inkişafından bəhs edən videoçarx nümayiş olunub.

Tədbirdə çıxış edən Mahir Məmmədov Azərbaycanın əsl şahmat ölkəsi olduğunu bildirərək ölkəmizdə şahmatın dövlət siyasəti olduğunu da qeyd edib. Daha sonra FIDE prezidenti Arkadi Dvorkoviçin çıxışına yer verilib. Rusiyalı funksioner başda Prezident İlham Əliyev olmaqla təşkilatçı ölkəyə belə bir yarışın keçirilməsi üçün minnətdarlığını bildirib.

Sonra şahmatçılara uğurlar arzulayan A.Dvorkoviç Dünya Kubokunu açıq elan edib. Sonda Beynəlxalq Şahmat Federasiyasının rəsmi himni səsləndirilib.

Qeyd edək ki, iyulun 30-da başlayacaq yarışda 80-dən çox ölkədən 206 kişi və 103 qadın şahmatçı mübarizə aparacaq. Dünya kubokuna avqustun 30-da yekun vurulacaq.