Futbol üzrə Avropa çempionatı start götürür
Bu gün futbol üzrə sayca 17-ci Avropa çempionatına start verilir. Almaniyada keçirilən yarışda ümumilikdə 24 komanda mübarizə aparır.
Turnirin A qrupunda Almaniya, Şotlandiya, Macarıstan və İsveçrə kollektivləri yer alıblar. B qrupunda İspaniya, Xorvatiya, İtaliya və Albaniya milliləri növbəti mərhələnin iştirakçılarını müəyyənləşdirəcəklər.
C qrupunda Sloveniya, Danimarka, Serbiya və İngiltərə yığmaları mübarizə aparacaqlar. D qrupunda Polşa, Niderland, Avstriya və Fransa komandaları qərarlaşıblar.
E qrupunda Belçika, Slovakiya, Rumıniya və Ukrayna seçmələri yarışacaqlar. F qrupunda isə Türkiyə, Gürcüstan, Portuqaliya və Çexiya milliləri qüvvələrini sınayacaq.
Qeyd edək ki, AVRO-2024-ün qarşılaşmalarına Almaniyanın 10 şəhəri ev sahibliyi edəcək. Münhendəki “Alyans Arena”da keçiriləcək turnirin açılış matçında meydan sahibi “Bundestim” Şotlandiya futbolçularını sınağa çəkəcək.
Ümumən qrup mərhələsinin görüşləri iyunun 26-dək davam edəcək. Reqlamentə əsasən, burada 1-ci və 2-ci yerləri tutan komandalar, eləcə də qrupu 3-cü pillədə tamamlayan 4 ən yaxşı kollektiv 1/8 finala yüksələcək. Yarışın final oyunu isə iyulun 14-ü Berlinin “Olimpiaştadion” arenasında təşkil olunacaq.