Futbol üzrə İtaliya çempionatında qalib məlumdur

A Seriyasında 2023/2024-cü illər mövsümünün qalibi müəyyənləşib.

33-cü turun matçında “Milan”ın qonağı olan “İnter” əzəli rəqibini məğlub edərək tarixində 20-ci dəfə İtaliya çempionu olub.

“Cuzeppe Meatsa” arenasında keçirilən qarşılaşmada hesabı 18-ci dəqiqədə Françesko Açerbi açıb. Fasiləyə tərəflər “neradzurri”nin minimal üstünlüyü ilə yollanıb.

2-ci yarıya “İnter” qolla başlayıb. Markus Türam “rossoneri”nin qapısına yol tapıb. “Milan” yalnız bir qolun əvəzini çıxıb.

80-ci dəqiqədə Fikayo Tomorinin dəqiq zərbəsi meydan sahibləri üçün ancaq təsəlli olub. Oyunun sonunda isə qarışıqlıq yaranıb. Nəticədə “Milan”dan Teo Ernandes və Davide Kalabriya, “İnter”dən isə Denzel Dumfris birbaşa qırmızı vərəqə ilə cəzalandırılıb.

Bununla belə görüşdə 2-1 hesabı ilə qalib gələrək sona 5 tur qalmış 2-ci yerdəki “Milan”la xal fərqini 17-yə çatdıran “İnter” çempionluğu təmin edib.

Bu titul “neradzurri”nin çalışdırıcısı Simone İnzaqi üçün də əlamətdar olub. 48 yaşlı mütəxəssis baş məşqçilik karyerasında ilk dəfə İtaliya çempionatının qızıl medallarına yiyələnib.