İspaniyada çempionluq uğrunda vacib görüşlər olub
La liqada çempionluq mübarizəsində olan komandalar növbəti oyunlarını keçiriblər.
Gecənin ən maraqlı matçı “Jirona” və “Atletiko” arasında olub. 7 qolun qeydə alındığı görüşdə hesabı artıq 2-ci dəqiqədə “Jirona”nın üzvü Valeri açsa da, qonaqlar Moratanın qolu ilə tezliklə tarazlığı bərpa ediblər. 1-1.
Fasiləyədək daha 3 qol vurulub. Meydan sahiblərindən Savio və Deyli Blind, “Atletiko”dan isə yenə Morata qapını dəqiq nişan alıb. İlk hissə “Jirona”nın 3-2 hesablı üstünlüyü ilə yekunlaşıb.
54-cü dəqiqədə Morata het-trikini rəsmiləşdirərək hesabı 3-3 etsə də, “Jirona” qələbə topunu vurmağa müvəffəq olub. İvan Martin əsas vaxta artırılan dəqiqələrdə matçda son nöqtəni qoyub. “Jirona” – “Atletiko”: 4-3.
Titulu hədəfləyən daha bir komanda Madrid “Real”ı da azarkeşlərini sevindirib. “Malyorka”nı qəbul edən “los blankos” gərgin keçən oyunda 1-0 hesabı ilə qalib gəlib.
“Kral klubu”nun qələbə qolunu isə 78-ci dəqiqədə Antonio Rüdiger vurub. Bu nəticədən sonra xallarının sayını 48-ə çatdıran “Real” hazırda “Jirona” ilə 1-ci, 2-ci yerləri bölüşdürür.
![icon](/images/loading.png)