Kərəm Aktürkoğlu “Qalatasaray”dan gedir?

“Qalatasaray”ın aparıcı futbolçularından Kərəm Aktürkoğlu Rusiyanın “Spartak” klubunun onu transfer etmək istəyinə münasibət bildirib. 25 yaşlı vinger Moskva təmsilçisinə keçməkdən imtina edib.

Son xəbərlərə görə, “qırmızı-ağlar” “Qalatasaray”la transferin bütün detalları ilə bağlı razılığa gəlib. Lakin oyunçunun Rusiyaya yollanmaqdan imtina etməsi “Spartak”ın bütün planlarını alt-üst edib.

İddia olunur ki, Kərəm və Moskva klubu məvacib baxımından fikir ayrılıqları yaşayıb. K.Aktürkoğlu illik təqribən 4 milyon avro, eləcə də bonuslar tələb etdiyi halda “Spartak” ona 2,4 milyon avro təklif edib. Bu səbəbdən türkiyəli futbolçu "cimbom"da qalmağa qərar verib.

Qeyd edək ki, Kərəm Aktürkoğlu 2020-ci ildən “sarı-qırmızılar”ın şərəfini qoruyur. Bu müddət ərzində 176 matçda İstanbul təmsilçisinin formasını geyinən oyunçu 45 qol və 40 assistlə yadda qalıb. Heyətin vacib üzvlərindən olan Kərəm komanda ilə Türkiyə çempionatında 2, superkubokda isə 1 dəfə qalib gəlib.