Konfrans liqasında yarımfinalın ilk görüşləri olub

UEFA Konfrans liqasında “Aston Villa” və “Olimpiakos” arasında yarımfinalın ilk matçı gözlənilməz nəticə ilə yekunlaşıb. Oyunun favoriti birmingemlilər olsa da, Yunanıstan klubu İngiltərədən inamlı qələbə ilə ayrılıb.

6 qolun vurulduğu görüşün ilk hissəsində Pirey komandasından El-Kaabinin dubluna meydan sahibləri Uotkinsin topu ilə cavab veriblər. 52-ci dəqiqədə Diabi hesabı bərabərləşdirsə də, çox keçmədən “Olimpiakos” yenidən üstünlük qazanıb.

Het-trik edən El-Kaabi ilə yanaşı, Esse fərqlənib. 84-cü dəqiqədə isə “Aston Villa”nın üzvü Duqlas Luiz 11 metrlik nöqtədən topu qapıya göndərə bilməyib. Oyun “Olimpiakos”un 4-2 hesablı qələbəsi ilə yekunlaşıb.

“Fiorentina” və “Brügge” arasında mərhələnin digər matçı da gərgin keçib. 5 qolun qeydə alındığı qarşılaşmada qalibiyyəti florensiyalılar bayram ediblər. İtaliya təmsilçisinin 3 dəqiq zərbəsinə Belçika klubu 2 topla cavab verib.

Qeyd edək ki, “Brügge” və “Fiorentina” cütündə yarımfinalın cavab oyunu mayın 8-də olacaq. “Olimpiakos” və “Aston Villa” arasında 2-ci görüş isə mayın 9-na nəzərdə tutulub.