Məşhur futbolçu Ronaldonu tənqid edib

İtaliya millisinin sabiq üzvü Antonio Kassano Kriştiano Ronaldonu tənqid edib.

O, Səudiyyə Ərəbistanının “Əl-Nəsr” klubunda top qovan K.Ronaldonun futbol oynaya bilmədiyini deyib.

“Ronaldo futbol oynamağı bacarmır. O, 3000 qol vura bilər. İquain, Aquero, Benzema, Levandovski, İbrahimoviç və Suarez komanda ilə yaxşı ünsiyyət qura bilirdilər. Tək məqsədi həmişə qol vurmaq olan Kriştianodan fərqli olaraq, onlar daha çox şey etməyi bacarırdılar”, – deyə A.Kassano bildirib.

Qeyd edək ki, müxtəlif vaxtlarda “Sportinq”, “Mançester Yunayted”, “Real Madrid” və “Yuventus” kimi məşhur klublarda forma geyinən 39 yaşlı K.Ronaldo bir neçə gün öncə “Əl-ittifaq” – “Əl-Nəsr” matçında fərqlənmə ilə karyerasında 902-ci qolunu vurub.