“Neftçi” basketbol liqasında yarımfinala adlayıb

“Neftçi” komandası Azərbaycan Basketbol Liqasının pley-off mərhələsində növbəti görüşünü keçirib.

“Ağ-qaralar” 1/4 finalın 2-ci oyununda “Ordu” klubu ilə üz-üzə gəlib.

Bakı İdman Sarayında təşkil olunan qarşılaşmanın ilk periodu “Neftçi”nin 22-11 hesablı üstünlüyü ilə yekunlaşıb. Növbəti hissədə fərq bir qədər də artıb: 40-18.

Böyük fasilədən sonra da təşəbbüs qonaqlarda olub. “Ordu” kollektivinin bütün səylərinə baxmayaraq, görüş “Neftçi”nin 88-54 hesablı qələbəsi ilə yekunlaşıb.

Komandanın uğurunda hərəyə 18 xal toplayan Vante Hendriks və Patrik Beykon önəmli rol oynayıblar. Beləliklə, “Ordu”nu 2-ci dəfə məğlub edən “ağ-qaralar” bu qalibiyyətdən sonra yarımfinala adlayıb.

Növbəti mərhələdə “Neftçi” basketbolçuları “Naxçıvan” ‒ “Abşeron” cütündə güclü olan klubla üz-üzə gələcəklər.