"Neftçi"nin basketbol komandası Liqanın finalına yüksəlib

30 aprel 2025 468 baxış

“Neftçi” komandası Basketbol Liqasında finala vəsiqə qazanıb.

“Ağ-qaralar” “Abşeron”a qarşı yarımfinal mərhələsinin 2-ci görüşündə də qalib gəlib.

Bakı İdman Sarayında təşkil olunan qarşılaşmada ilk period “Neftçi”nin 22-15 hesablı üstünlüyü ilə bitib.

2-ci periodda təşəbbüsə yiyələnən “Abşeron” hesabda irəli çıxıb: 37-32. Sonrakı hissələrdə isə yenidən qonaqlar daha yaxşı təsir bağışlayıblar.

Getdikcə fərqi artıran “ağ-qaralar” yekunda 81-72 hesabı ilə güclü olub. Kollektivin uğurunda 31 xal toplayan Hendriks Vens Rouz əsas pay sahibi olub.

Beləliklə, yarımfinal seriyasının 2-ci oyununda da qalib gələn “Neftçi” Basketbol Liqasının finalına adlayıb. Komanda həlledici qarşılaşmada son çempion “Sabah”la üz-üzə gələcək.

Qeyd edək ki, “Neftçi” və “Sabah” arasında final seriyasının ilk görüşü mayın 2-si baş tutacaq. Turnirin qalibi 4 oyunda qələbə qazanan tərəf olacaq.

#Neftçi komandası