“Qarabağ”ın qapıçısı Andrey Lunyov Rusiyaya qayıdır?

“Qarabağ”ın rusiyalı qapıçısı Andrey Lunyov karyerasını vətənində davam etdirməyə yaxındır.

Bu ölkənin mətbuatında yer alan xəbərlərə görə, 32 yaşlı futbolçu Moskva “Dinamo”sunun diqqət mərkəzindədir.

Bildirilir ki, Lunyovun çıxışını bəyənən paytaxt klubu mövsümün sonunda onunla danışıqlara başlamaq istəyir. Bundan başqa, Andrey Rusiyanın daha iki komandası “Krılya Sovetov” və “Rostov”un da transfer planlarına daxildir.

Qeyd edək ki, ötən yay azad agent kimi “Qarabağ”a qoşulan Lunyov “köhlən atlar”ın əsas qolkiperidir. Bütün yarışlarda 32 matçda forma geyinən oyunçu bu görüşlərdə qapısından 40 top buraxıb. Onun Ağdam təmsilçisi ilə müqaviləsi bu ilin yayınadək nəzərdə tutulsa da, “Qarabağ” birtərəfli olaraq sözləşmənin müddətini daha bir illik uzada bilər.