"Neftçi" azarkeşlərə müraciət etdi

“Neftçi” “Spartak”a qarşı keçirəcəkləri yoldaşlıq matçından əvvəl azarkeşlərə müraciət edib.

“Ağ-qaralar”ın mətbuat xidmətinin yaydığı məlumatda bildirilib ki, qonaq komandanın fanatları üçün "Neftçi Arena"da xüsusi sektor ayrılacaq.

"Həm ölkəmizdə olan, həm də qonşu ölkədən gələcək azarkeşlərin təhlükəsizliyinin yüksək şəkildə təmin olunması məqsədilə müvafiq tədbirlərin görülməsi planlaşdırılır. “Neftçi Arena”da keçiriləcək görüşdə Moskva təmsilçisinin azarkeşləri üçün xüsusi sektor ayrılacaq.

“Neftçi” fanatları üçün nəzərdə tutulacaq digər sektorlarda isə təhlükəsizlik məqsədilə “ağ-qaralar”a aid olmayan, digər komandalara və başqa ölkələrə məxsus atributları daşıyan azarkeşlərin oyunu izləməsi məhdudlaşdırılacaq. “Neftçi” olaraq azarkeşlərin təhlükəsizliyi üçün nəzərdə tutulan bu tədbirlərin anlayışla qarşılanacağına inanırıq", – deyə klubdan bildirilib.

Qeyd edək ki, martın 23-də keçiriləcək "Neftçi" – "Spartak" görüşü saat 18-də başlayacaq.