Top-5 liqalarda bol qollu görüşlər olub

Mövsümün 2-ci yarısında yaxşı formada olan “Mançester Yunayted” növbəti qələbəsini qazanıb.

“Qırmızı şeytanlar” Premyer liqanın 24-cü turunda “Lester Siti” ilə üz-üzə gəlib. İlk hissəni Reşfordun qolu sayəsində öndə tamamlayan mankunianlar 2-ci yarıda daha 2 dəfə fərqləniblər. Dubl edən Reşfordla yanaşı, Ceydon Sançonun zərbəsi dəqiq olub. 3-0 hesabı ilə qalib gələn “Yunayted” xallarının sayını 49-a çatdırıb və 3-cü yerdədir. Qeyri-sabit çıxış edən “Lester” isə 24 xalla 14-cüdür.

Turun digər oyununda “Tottenhem” London derbisində “Vest Hem”i məğlub edib. “Mahmızlar” qələbəni 2 cavabsız qolla qazanıblar. Meydan sahiblərinin heyətində Emerson və Son Hön Min hədəfi dəqiq nişan alıb. Bu nəticədən sonra “Tottenhem” 42 xalla 4-cü, 3 görüşdür qalibiyyətə həsrət olan “Vest Hem” isə 18-ci pillədədir.

Fransa çempionatında 24-cü turun mərkəzi görüşü PSJ və “Lill” arasında olub. 7 qolun vurulduğu matçda parislilər güclü olublar. “Pari Sen-Jermen”dən Mbappe 2, Neymar və Messi isə 1 topla yadda qalıb. Qonaqlardan isə Diakite, Deyvid və Bamba fərqlənib. PSJ - “Lill”: 4-3. Qələbədən sonra aktivində 57 xal olan Paris klubu liderliyini davam etdirir. 41 xalı olan “Lill” isə 6-cıdır.