ABŞ və Çin arasındakı gərginlik neftə də təsir etdi | Ekspertlər danışdı

Dünya bazarlarında "qara qızıl"ın qiyməti yenidən ucuzlaşmaqdadır. "Brent" markalı neftin qiyməti 60 dollara, Qərbi Texas markalı neft isə 58 dollara təklif olunub. Bu ucuzlaşmaya bir tərəfdən "OPEC plus" ölkələrinin hasilatı artırmaq qərarı, digər tərəfdən isə ABŞ və Çin arasındakı geosiyasi gərginliyin yaratdığı iqtisadi artımın zəifləməsi gözləntiləri səbəb olub. Ekspertlər bu gərginliyin neftə tələbatı azaldacağını proqnozlaşdırır. İqtisadçı Xalid Kərimli bu vəziyyətin Azərbaycan iqtisadiyyatına təsirini şərh edərək, qiymətin hər 10 dollar ucuzlaşmasının illik gəlirləri 2,1 milyard manat azaltdığını bildirib. Dövlət Neft Fondunun "Azəri-Çıraq-Günəşli" yatağından əldə etdiyi gəlirlərdə azalma müşahidə edilsə də, bunun hələlik büdcə öhdəliklərinə təsir etmədiyi qeyd olunub.