Azərbaycan Rusiyaya yumurta satışını artıracaq | Detallar açıqlandı

Azərbaycandan Rusiyaya yumurta ixracına başlanılıb.

Qida Təhlükəsizliyi Agentliyi ilə Rusiyanın Baytarlıq və Fitosanitar Nəzarət üzrə Federal Xidməti arasında ixracla bağlı razılaşma əldə olunub.

Bəs ixrac ölkədə yumurta qıtlığına və qiymət artımına səbəb ola bilərmi?

Quş Əti, Yumurta İstehsalçıları və İxracatçıları Assosiasiyasının sədri Mürvət Həsənli bildirib ki, artıq Rusiyaya 1 milyon 500 min ədəd yumurta göndərilib. 2024-cü ildə ixracın artırılması nəzərdə tutulub:

“Yanvar ayında 15-20 milyon ədəd yumurta ixrac edəcəyik. Bu, yerli bazarda qiymətə heç bir təsir etməyəcək. Çünki hazırda ölkədə gündəlik tələbat 3,4-3,6 milyon ədəddir. İstehsalımız isə 4,9-5 milyonun üzərindədir”.

Assosiasiya sədrinin sözlərinə görə, Rusiyadan əlavə, Qətər, Birləşmiş Ərəb Əmirlikləri, İraq, Əfqanıstan və digər ölkələrə də yumurta ixrac edilir. Həmçinin Niderlanddan və Belçikadan da məhsul alınması ilə bağlı təklif gəlib.