Azərbaycanın enerji siyasətinin yaratdığı imkanlar

Xəzər dənizinin Azərbaycan sektorunda, Bakıdan təxminən 100 kilometr cənub-şərqdə yerləşən “Abşeron” qaz-kondensat yatağında hasilata başlanılması Azərbaycanın karbohidrogen ehtiyatlarının dünya bazarındakı yeri və rolunu yenidən beynəlxalq müzakirə mövzusuna çevirib.

Məlum olduğu kimi, “Abşeron” yatağının ehtiyatı da daxil olmaqla Azərbaycanın təsdiq olunmuş qaz ehtiyatları 2,2 trilyon kubmetrdir. Hazırda ölkənin illik qaz ixracı 21 milyard kubmetr təşkil edir. Yaxın 5 ildə bu göstəricinin 30-31 milyard kubmetrə çatdırılması planlaşdırılır. Avropaya qaz ixracının isə 11 milyard kubmetrdən 20 milyard kubmetrədək artırılacağı gözlənilir.

Hazırda dünyada yetərincə karbohidrogen ehtiyatları olan ölkələr var ki, düzgün dəyərləndirmə və müstəqil siyasət aparılmadığından ya özünün zəruri enerji ehtiyacını ödəməkdə çətinlik çəkir, ya da öz sərvətinə sahib çıxa bilmir. Azərbaycan isə enerjinin idxal və ixracında çoxşaxəliliyi təmin etməklə bir tərəfdən iqtisadi inkişafı üçün yeni üfüqlər açırsa, digər tərəfdən də öz ərazisini tranzit nəqletmə coğrafiyasına çevirir. Hazırda işğalçı Ermənistandan başqa bütün qonşu ölkələrlə birbaşa enerji siyasəti həyata keçirilir.

Məhz Azərbaycanın yürütdüyü düzgün neft və qaz strategiyası nəticəsində qardaş Türkiyə də tarixdə ilk dəfədir ki, tranzit enerji imkanlarını maksimum həddə çatdırıb.