Bakı-Supsa kəmərinin özəllikləri | Rüfət Qəmbərovdan açıqlama

Bakı-Supsa boru kəməri xüsusiyyətlərinə görə Qara dəniz sahilində yerləşən neft emalı zavodlarında emala ən uyğun olan neftə malik şirkətlər üçün mühüm rəqabət üstünlüklərinə sahibdir.

Bunu “SOCAR Midstream Operations” şirkətinin Biznesin inkişafı şöbəsinin rəhbəri Rüfət Qəmbərov bildirib.

Onun sözlərinə görə, neftin kimyəvi tərkibini və Qara dənizdə müvafiq infrastrukturun mövcudluğunu nəzərə alaraq Bakı-Supsa uzunmüddətli perspektivdə strateji əhəmiyyətini qoruyur.

“Əminik ki, zamanla boru kəmərinin işinin dayandırılmasına təsir edən şərtlər dəyişəcək. “SOCAR Midstream” SOCAR-ın bir hissəsi olaraq və dövlətin maraqları naminə onun gələcək istifadəsi ilə bağlı təklifləri nəzərdən keçirməyə hazırdır”, ‒ deyə şöbə müdiri əlavə edib.

Qeyd edək ki, uzunluğu 837 kilometr, diametri isə 530 millimetr olan boru kəməri “Azəri-Çıraq-Günəşli” yataqlarının işlənməsi çərçivəsində inşa edilib. Onun ötürücülük qabiliyyəti ildə 7,5 milyon ton neft təşkil edir.