Kredit faizləri necə azala bilər? - İqtisadçılar detalları açıqladı - Baku TV

Mərkəzi Bankın sədri Taleh Kazımov yerli mediaya müsahibəsində bildirib ki, bank sektoru üçün çağırış məhz təmərküzləşmədir və sektorda rəqabət artırılmalıdır.

O vurğulayıb ki, dominant banklar var və onların faizlərinin dəyişiminin ümumi sektora təsiri var.

İqtisadçı Xalid Kərimli deyir ki, kreditlərin faizlərinin yüksək olmasının yeganə səbəbi təmərküzləşmə və rəqabətin aşağı səviyyədə olması deyil:

“Bu, maliyyə resurslarının dəyəridir. Yəni bank sektorunun çatmaq üçün əldə etdiyi pul resurslarının dəyəridir. İkinci əsas amil isə risk səviyyəsidir. Həm ölkə iqtisadiyyatı, həm problemli kreditlər, həm də şirkətlərlə bağlı risk səviyyəsi burada rol oynayır. Təbii ki, burada təmərküzləşmə və rəqabətin səviyyəsi də əhəmiyyətli təsir göstərir. Rəqabətin səviyyəsinin aşağı olmasında həm də təmərküzləşmənin çox olmasının rolu var”.

Xalid Kərimli hesab edir ki, hələ 2023-cü ildə Mərkəzi Bankın məcburi ehtiyat normaları ilə bağlı tələbi yüksəltməsinin məqsədi bank sektorunda təmərküzləşmənin səviyyəsini aşağı salmaq idi. Lakin bu addım nəticə verməməklə yanaşı, faizlərin artmasına səbəb oldu. Bu istiqamətdə digər addım isə kiçik və orta bankların əməkhaqqı ödənişlərinə çıxışının təmin edilməsidir. Bu belə banklara müştəri bazası və faizsiz vəsaitlər verə bilər.