Moldovanın energetika nazirindən SOCAR-la bağlı açıqlama

Moldova SOCAR-ın bu ölkədə gübrə istehsalına başlamasında maraqlıdır.

Bu barədə “Trend”ə Moldovanın energetika naziri Viktor Parlikov deyib.

Nazir bildirib ki, SOCAR-ın gübrə istehsalı sahəsində təcrübəsi var. Böyük gübrə bazarlarından biri Rumıniya və Bolqarıstandır. Məhsulun bu bazarlara daha yaxın yerdə istehsalı məqsədəuyğun olar.

Həmçinin Moldova kənd təsərrüfatı ölkəsi olaraq bu məhsullardan özü istifadə edir və Avropa İttifaqı ölkələrinə, Ukraynaya asanlıqla ixrac oluna biləcəyi yaxşı logistika mərkəzidir.

V.Parlikovun sözlərinə görə, əgər SOCAR Moldovada qazpaylayıcı infrastrukturuna investisiya qoymaqda maraqlıdırsa, bu variant da istisna edilmir.

Qeyd edək ki, SOCAR-ın Karbamid zavodu gübrə istehsal edir. Hazırlanan məhsulun əksər hissəsi ixrac olunur.