Ötən il 9 enerji obyekti istismara verilib

2022-ci ildə “AzərEnerji” ASC tərəfindən 9 enerji obyekti istismara verilib, 2 enerji obyektinin təməli qoyulub və 6 enerji obyektinin tikinisinə baxış keçirilib.

İlin ən mühüm hadisələrindən biri – dövlətlərarası strateji əhəmiyyətə malik “Yaşma” qovşaq yarımstansiyasının yenidənqurmadan sonra istismara verilməsi olub. İl ərzində həmçinin “Qobu” yarımstansiyasının və “Qobu” Elektrik Stansiyasının, Ağdam rayonunda “Ağdam-1” və “Ağdam-2” yarımstansiyalarının, o cümlədən “Qarabağ Regional Rəqəmsal İdarəetmə Mərkəzi”nin açılışı baş tutub, “Ağcabədi” yarımstansiyası isə istismara verilib. Azərbaycan-Türkiyə-Avropa ölkələrarası beynəlxalq enerji layihəsi çərçivəsində “Cəbrayıl” Enerji Qovşağının təməli qoyulub.

İşğaldan azad edilən ərazilərdə də yenidənqurma işləri aparılıb. Kəlbəcərdə istismara verilən “Kəlbəcər-1” Kiçik Su Elektrik Stansiyası, “Çıraq-1”, “Çıraq-2”, “Qamışlı”, “Soyuqbulaq” və “Meydan” kiçik su elektrik stansiyaları, o cümlədən Laçın rayonunda tikilən “Qorçu” yarımstansiyası və ikidövrəli “Kəlbəcər-Laçın” ötürmə xəttinin inşası, “Laçın" Qovşaq Yarımstansiyasının təməlinin qoyulması bölgənin elektrik təchizatında vacib rol oynayır.

Onu da qeyd edək ki, “Oğuz-1”, “Oğuz-2”, “Oğuz-3” kiçik su elektrik stansiyalarının açılışı da yenicə yola saldığımız il baş tutub. Mingəçevir şəhərində isə yeni elektrik stansiyası yaradılır. Bu generasiya müstəqillik dövründə tikiləcək ən böyük elektrik stansiyası olacaq.