"Azərenerji" Naxçıvanda böyük layihəni gerçəkləşdirir | İşlər nə vaxt bitəcək?

Naxçıvanın enerji sistemi yenidən qurulur. Hazırda regionun elektrik enerjisi təminatında əsas rol oynayan istismar müddətini keçmiş bir neçə yarımstansiya sökülərək yenidən tikilir.

Belə ki, 154/110/10 kilovoltluq “Babək”, 110/35/10 kilovoltluq “Çeşməbasar” və 110/35/10 kilovoltluq “Naxçıvan” yarımstansiyaları sökülərək tam yenidən tikilir. Həmçinin Naxçıvan Regional Rəqəmsal İdarəetmə və SCADA Mərkəzi, eləcə də müasir texniki infrastrukturlar yaradılır.

“Azərenerji” Naxçıvan Enerji Şəbəkəsinin rəhbəri Məhərrəm Abbasov bildirib ki, yeni yarımstansiyaların istifadəyə verilməsi nəticəsində regionda elektrik enerjisi təchizatının etibarlılığı və dayanıqlılığı əhəmiyyətli dərəcədə artacaq, sənaye və sosial infrastrukturun enerji təminatı daha yüksək səviyyədə təmin olunacaq.

Bununla yanaşı, “Azərenerji” tərəfindən Naxçıvan ötürücü elektrik şəbəkəsinin modernləşdirilməsi istiqamətində də ciddi işlər aparılır.

Muxtar Respublikanın ötən əsrin 50-ci illərinin sonlarından istismarda olan hava elektrik verilişi xətləri “Azərenerji” tərəfindən sökülərək yenidən qurulur. İlkin mərhələdə 110 kilovoltluq “Culfa”, “Ordubad-1” və “Ordubad-2” yüksəkgərginlikli ötürmə xətləri 2 dövrəli olmaqla ümumilikdə 68 kilometr məsafədə yenidən çəkilir.

“Azərenerji” tərəfindən Naxçıvan Muxtar Respublikasında 3 istiqamətdə çəkilən ötürmə xətlərində və 3 yerdə tikilən yarımstansiyalarda, o cümlədən Regional Rəqəmsal İdarəetmə Mərkəzində aparılan işlərin 2027-ci il ərzində yekunlaşdırılması planlaşdırılır.

Qeyd edək ki, görülən işlər Azərbaycan Prezidentinin 23 noyabr 2024-cü il tarixli 235 nömrəli Fərmanına uyğun olaraq aparılır.