SOCAR Özbəkistan istehsallı naftanı Qara dənizlə beynəlxalq bazarlara çatdırır - Baku TV

"SOCAR Trading" Özbəkistandan naftanın yüklənməsinə başlayıb və onu Qara dəniz limanlarına çatdırır.

Bu barədə SOCAR-ın Beynəlxalq biznesin inkişafı departamentinin rəhbəri Toğrul Köçərli Bakıda Qara Dəniz Ticarət və İnkişaf Bankının (QDTİB) Rəhbərlər Şurasının 28-ci illik toplantısı çərçivəsində keçirilən biznes-forumda bildirib.

Onun sözlərinə görə, QDTİB region ölkələrinin yaxınlaşmasına kömək edir, Azərbaycan isə burada Mərkəzi Asiyadan Aralıq dənizi və Qara dəniz vasitəsilə beynəlxalq bazarlara yük axınlarının tranzitini təmin edərək əsas hab rolunda çıxış edir.

"Azərbaycanın ixrac və tranzit infrastrukturunun təchizatçısı kimi rolu artacaqmı?" sualını cavablandıran Toğrul Köçərli "əlbəttə" deyə bildirib.

O qeyd edib ki, ənənəvi olaraq şirkət Mərkəzi Asiyanın iki ölkəsində – Qazaxıstan və Türkmənistanda çox aktivdir: "Bu iki dövlətdən beynəlxalq bazarlara demək olar ki, 4 milyon ton neft göndərərək bu aktivliyə şərait yaradılıb. Cari ildən etibarən biz bu siyahıya Özbəkistanı da əlavə etmişik".

Toğrul Köçərli vurğulayıb ki, "SOCAR Trading" Özbəkistanda istehsal olunan neft məhsullarından biri olan naftanın Qara dəniz limanlarına nəqlinə başlayıb.