Qahirədə enerji konfransı | SOCAR Yaxın Şərqdə nəyi planlaşdırır? - Baku TV

Qahirədə “Əməkdaşlıq, fəaliyyət və reallıq vasitəsilə enerji keçidi” şüarı altında keçirilən 9-cu Misir Beynəlxalq Enerji Konfransı və Sərgisi (EGYPS 2026) plenar iclaslarla davam edib.

İclasda SOCAR-ın vitse-prezidentinin müavini Vitaliy Bəylərbəyov və dünyanın bir çox nəhəng şirkətlərinin rəhbərləri çıxış ediblər.

Müzakirələrdə enerji sektorunda yeniliklər, gələcək planlar və yeni ticarət tərəfdaşlıqlarının əhəmiyyəti vurğulanıb.

Vitaliy Bəylərbəyov çıxışında SOCAR-ın Misirlə əməkdaşlıqda yeni mərhələyə daxil olduğunu, Misirin Dövlət Neft Korporasiyası ilə imzalanmış sazişin əhəmiyyətini qeyd edib.

SOCAR rəsmisi Azərbaycanın etibarlı xam neft və qaz tədarükçüsü olduğunu vurğulayıb və son illərdə qaz ixracının əhəmiyyətli dərəcədə artdığını bildirib.

Qeyd edib ki, Azərbaycan qazı hazırda 16 ölkəyə, o cümlədən Avropa İttifaqının 10 ölkəsinə, həmçinin artıq bir ilə yaxındır ki, Suriyaya ixrac olunur.

Diqqətə çatdırılıb ki, Azərbaycanın nefti ilə yanaşı, Türkmənistan və Qazaxıstan neftinin də dünya bazarına çıxarılmasına xidmət edir.

Vurğulanıb ki, Cənub Qaz Dəhlizinin buraxılış gücünün artırılması, hətta iki dəfə genişləndirilməsi imkanları nəzərdən keçirilir. Bu proses yeni yataqların istismara verilməsi ilə dəstəklənəcək. Məsələn, “Total Energies” və tərəfdaşlarla birgə həyata keçirilən Abşeron qaz-kondensat yatağı layihəsi 2029-cu ildə böyük həcmdə qaz və kondensat hasilatını təmin edəcək. Ümumilikdə əlavə olaraq ən azı 15 milyard kubmetr qaz tədarükü imkanının yaranacağı qeyd olunub.