"BP-Azərbaycan" "Şahdəniz Alfa" platformasından hasilatı bərpa etdi | "Bulgargaz" bəyanat yaydı

Azərbaycan Bolqarıstana qaz nəqlini bərpa edib.

Bu barədə Bolqarıstanın təbii qaz tədarükçüsü “Bulgargaz” şirkətinin bəyanatında deyilir.

“Azərbaycanla uzunmüddətli müqavilə əsasında Bolqarıstana qaz tədarükü bazar günü, yanvarın 19-da bərpa edilib”, – şirkət yanvarın 20-də bildirib.

Xəbər verdiyimiz kimi, “Bulgargaz” ötən həftə Azərbaycanın texniki səbəblərdən yanvarın 7-dən etibarən Bolqarıstana qaz nəqlini müvəqqəti dayandırdığını açıqlamışdı.

Tədarükün yanvarın 11-də bərpa olunacağı bildirilsə də, ayın 10-da BP şirkəti “Şahdəniz Alfa” platformasından Səngəçal terminalına kondensatın nəqli üçün nəzərdə tutulmuş boru kəmərində texniki nasazlıq barədə məlumat verib. Problemi mümkün qədər tez həll etmək üçün platformanın fəaliyyəti müvəqqəti olaraq dayandırılıb.

Yanvarın 18-də axşam kondensat boru kəmərində yaranmış problem tam aradan qaldırıldıqdan sonra “BP-Azərbaycan” şirkəti “Şahdəniz Alfa” platformasından hasilatı bərpa edib.

Qeyd edək ki, platformadan hasilatın dayandırılması Azərbaycan qazının Bolqarıstan və Serbiyaya nəqlinə təsir göstərib. Bolqarıstanın Azərbaycanla ildə bir milyard kubmetr həcmində qaz tədarükünə dair uzunmüddətli müqaviləsi var.