"Equinor" payını SOCAR-a satmaq üzrə sövdələşməni başa çatdırdı

Norveçin “Equinor” şirkəti Xəzər dənizinin Azərbaycan sektorunda “Qarabağ” neft yatağının işlənməsi layihəsində 50% payının SOCAR-a satılması üzrə sövdələşməni başa çatdırıb.

Bu barədə “Equinor” şirkətindən məlumat verilib.

“SOCAR-a “Qarabağ” layihəsində 50% payın satışı üzrə sövdələşmə 2024-cü il aprelin 24-də başa çatıb”, – şirkətin materiallarında bildirilib.

Eyni zamanda “Equinor” 2024-cü ilin sonuna qədər “Azəri-Çıraq-Günəşli” yataqlar bloku və Bakı-Tbilisi-Ceyhan neft boru kəmərinin işlənməsi layihələrindəki paylarının satışı üzrə sövdələşməni tamamlamağı planlaşdırdığını qeyd edir.

Norveç şirkəti xatırladıb ki, 2023-cü il dekabrın 22-də SOCAR-la “Azəri-Çıraq-Günəşli”, Bakı-Tbilisi-Ceyhan və “Qarabağ” layihələri də daxil olmaqla Azərbaycandakı portfelinin satışına dair Saziş imzalayıb.

Qeyd edək ki, “Equinor” SOCAR-a “Azəri-Çıraq-Günəşli” blokunun işlənməsi layihəsində 7,27%, Bakı-Tbilisi-Ceyhan neft kəmərində 8,71%, “Qarabağ” yatağının işlənməsi layihəsində isə 50%-i satıb. Sövdələşmədən əvvəl SOCAR-ın AÇG-də iştirak payı 25%, BTC-də 25%, “Qarabağ” yatağında isə 50% təşkil edib.

“Qarabağ” yatağı Bakıdan 130 km şərqdə yerləşir. Müqavilə sahəsi 16 milyon ton neft və 28 milyard kubmetr qaz ehtiyatına malikdir. Burada dənizin dərinliyi 180 metrdir.