Səfər çərçivəsində məlumatlandırma sessiyası keçirilib - Baku TV

İyunun 16-da Enerji Dialoqu Platforması çərçivəsində gənc media nümayəndələri üçün keçirilən silsilə məlumatlandırma sessiyalarının iştirakçılarının “Neft Daşları”na səfəri təşkil olunub.

Media nümayəndələri əvvəlcə ümummilli lider Heydər Əliyevin abidəsini ziyarət edib, önünə gül dəstələri düzüblər. Ulu öndərin adını daşıyan muzeylə tanış olan nümayəndə heyətinə ümummilli liderin neft sənayesinin inkişafına göstərdiyi diqqət və qayğısını əks etdirən tarixi fotolar barədə məlumat verilib.

Gənc jurnalistlər həmçinin “Neft Daşları”nın keçmiş və hazırkı dövrünü əks etdirən fotostend və Qaz-turbin İstilik Elektrik Stansiyasının fəaliyyəti ilə tanış olublar. Onlara dünyada açıq dənizdə sənaye üsulu ilə qazılan ilk neft quyusu, onun tarixi və istismar dövrü, Xəzərdə ilk insansız platforma olan “Abşeron” İlkin Hasilat Sxeminin “Neft Daşları”ndakı Mərkəzi İdarəetmə Otağı barədə məlumat verilib.

Sonra növbəti məlumatlandırma sessiyası keçirilib. Sessiyada gənc jurnalistlərə SOCAR-ın kəşfiyyat, işlənmə və hasilat əməliyyatları, əldə olunan uğurlar və gələcək hədəflərlə bağlı ətraflı məlumat verilib, media nümayəndələrini maraqlandıran suallar cavablandırılıb.