Şirkətin emal-kimya sənayesi üzrə fəaliyyətindən bəhs olunub - Baku TV

İyunun 25-də Enerji Dialoqu Platforması çərçivəsində gənc media nümayəndələri üçün növbəti məlumatlandırma sessiyası Heydər Əliyev adına Neft Emalı Zavodunda təşkil olunub.

Sessiyada təqdimatla çıxış edən "SOCAR Downstream" MMC-nin baş direktoru Emil Alxaslı şirkətin emal-kimya sənayesi üzrə həyata keçirdiyi çoxşaxəli fəaliyyətindən danışıb, həmçinin əldə olunan nəticələr, perspektivdə nəzərdə tutulan layihələr barədə məlumat verib.

Heydər Əliyev adına Neft Emalı Zavodunun direktoru Xəyal Cəfərov zavodun modernizasiya və yenidənqurma layihəsi üzrə görülən işlərdən bəhs edib.

"SOCAR Türkiyə"nin texniki servis üzrə vitse-prezidenti Ergün Binboğa SOCAR-ın qardaş ölkədəki emal və neft-kimya biznes bölməsinin fəaliyyəti ilə bağlı çıxış edib.

SOCAR-ın Emal və neft-kimyası biznesinin idarə edilməsi Departamentinin rəisi Orxan Əliyev təqdimatında SOCAR tərəfindən “Italiana Petroli” şirkətinin səhmlərinin “API Holding”dən alınması, eləcə də şirkətin İtaliyadakı fəaliyyətinin perspektivləri barədə danışıb.

Sonra media nümayəndələrini maraqlandıran suallar cavablandırılıb. Görüş çərçivəsində jurnalistlər üçün zavod ərazisinə sahə turu təşkil olunub.

Sonda xatirə fotosu çəkdirilib.