“SOCAR Green”in yeni layihəsi | Enerji səmərəliliyi ilə bağlı hansı addımlar atılacaq?

"SOCAR Green" enerji səmərəliliyinin artırılması üzrə təcrübəsini region ölkələri ilə bölüşəcək.

Bunu "SOCAR Green"in Baş direktoru Elmir Musayev Bakıda keçirilən 2-ci Beynəlxalq Su Təsərrüfatı Sərgi və Konfransı – "Baku Water Week" (Bakı Su Həftəsi) çərçivəsində baş tutan "Alternativ su mənbələrinin idarəedilməsində innovativ yanaşmalar" adlı panel müzakirələrində deyib.

Onun sözlərinə görə, "SOCAR Green" ümumi gücü 1,7 giqavat olan portfelə malikdir:

"SOCAR Green" Çin, Avropa şirkətləri ilə əməkdaşlıq edir. Fəaliyyət dairəsinə günəş, külək, "yaşıl hidrogen", geotermal enerji və enerji səmərəliliyi ilə müşayiət olunan su səmərəliliyi ilə bağlı layihələr daxildir.

Şirkətimiz Azərbaycan Dövlət Su Ehtiyatları Agentliyi ilə quruda külək, suda üzən və ya sabit günəş panelləri və batareya enerji saxlama həllini əhatə edəcək pilot hibrid layihəni həyata keçirməyi planlaşdırır".

O bildirib ki, ADSEA burada alıcı qismində iştirak edəcək. Təcrübə uğurlu olarsa, onu daha geniş regiona yaymaq mümkün olacaq:

"Çünki Mərkəzi Asiyada olduğu kimi, qonşu ölkələr, hamımız keçmiş Sovet İttifaqının infrastruktur mirasına sahibik. Səmərəsizliyin çox hissəsi bu köhnəlmiş infrastrukturdan qaynaqlanır.

Buna görə də, sadəcə, düzgün idarəetmə və təhlil ilə yeni texnologiyaları tətbiq edərək bir çox yaxşı nəticələrə nail ola bilərik. Bu pilot layihəni tamamladıqdan sonra onu Azərbaycandakı digər obyektlərə yaya bilərik. Eyni zamanda bu yanaşmanı Mərkəzi Asiyada və qonşu ölkələrdə tətbiq edə bilərik".