Vergi, rüsum və cərimələr... | 2026-cı ilin iqtisadi yenilikləri - Baku TV

2026-cı ildə digər sahələrdə nələrin baş verəcəyini dəqiq demək bir qədər çətin olsa da, iqtisadiyyatda bir çox istiqamətdə hansı yeniliklərin olacağı dəqiqdir.

Bu sırada ilk növbədə vergi sahəsində bir sıra güzəştlərin müddətinin uzadılmaması gəlir. Belə ki, qeyri-neft-qaz sektorunun özəl bölməsində çalışanların əməkhaqları mərhələli şəkildə vergiyə cəlb olunacaq. Bununla da aylıq məbləğindən asılı olaraq 2500 manatadək gəlirə 2026-cı ildə 3 faiz, 2500-8000 manat aralığında gəlirə 10 faiz və 8000 manatdan yuxarı olan hissəyə isə 14 faiz vergi tətbiq ediləcək. Eyni zamanda bir neçə illik fasilədən sonra hibrid və elektrik mühərrikli avtomobil idxal edənlər yenidən əlavə dəyər vergisi ödəməli olacaqlar.

Elektromobillərin satışı da əlavə dəyər vergisinə cəlb ediləcək. Bundan əlavə, 7 ildən köhnə olan ənənəvi avtomobillərin idxalında aksiz əmsal benzin mühərrikli olanlar üçün 1,2-dən 1,5-ə, dizellər üçün isə 1,5-dən 2-yə yüksəldiləcək.

2026-cı ildən həmçinin bütün fərdi sahibkarlar dövriyyənin 2 faizi səviyyəsində məcburi dövlət sosial sığorta haqqı ödəcəyəklər. Lakin məbləğ minimum əməkhaqqının 15 faizindən 100 faizinədək, yəni 60-400 manat aralığında olacaq. Sabit qəbz və ailə kəndli təsərrüfatlarında isə əvvəlki rejim qalsa da, faiz dərəcələri artacaq.

2026-cı il yanvarın 1-dən eyni zamanda pərakəndə ticarət və əhaliyə xidmət sahələrində nağdsız dövriyyə üzrə əlavə dəyər vergisinin qeydiyyat limiti 200 min manatdan 400 min manatadək yüksəldilir. Bundan başqa, spirtli içkilərə, tütün məmulatına tətbiq edilən aksiz vergisi artırılacaq. Eyni zamanda 2026-cı ildən kvadrisikl və mobil cihazların idxalına aksiz vergisi tətbiq ediləcək.