Vergilər qalxdı: siqaretin qiyməti nə qədər qalxacaq?

Tütün məmulatları və alkoqollu içkilər üzrə aksiz dərəcələri artırılacaq.

Bu barədə Maliyyə Nazirliyinin hazırladığı “2024-cü ilin dövlət və icmal büdcələrinin ilkin göstəricilərinə dair Açıqlama”da qeyd olunub.

Bəs bu verginin artırılması tütün məmulatları və alkoqollu içkilərin bahalaşmasına səbəb olacaqmı?

“Aksiz vergisinin artması sahibkarın xərclərinin artması deməkdir. Bu da sonda qiymətin artmasına gətirib çıxaran amil olur”, – deyə iqtisadçı Xalid Kərimli deyib.

Bu məhsullar 2023-cü ildə də bahalaşıb. Dövlət Statistika Komitəsinin məlumatına görə, avqust ayında 2022-ci ilin müvafiq ayı ilə müqayisədə tütün məmulatları 5 faizdən çox, alkoqollu içkilər isə 3 faizə yaxın bahalaşıb. Yanvar-avqust ayları ərzində əhali tütün məmulatları və alkoqollu içkilərə 1 milyard 600 milyon manata yaxın vəsait xərcləyib.