3 ölkənin enerji tərəfdaşlığı | Prezident Çin və İtaliya ilə əməkdaşlıqdan danışdı

“8 Noyabr” Elektrik Stansiyasının ərsəyə gəlməsində İtaliya və Çin şirkətlərinin böyük payı var”.

Bu sözləri Prezident İlham Əliyev “8 Noyabr” Elektrik Stansiyasının açılış mərasimində çıxışı zamanı söyləyib.

Dövlət başçısı vurğulayıb ki, Azərbaycan energetikləri ilə birlikdə bu layihə qısa müddətdə reallaşdırılıb.

Prezidentin sözlərinə görə, həm İtaliya, həm də Çin Azərbaycanın strateji tərəfdaşıdır:

“Strateji tərəfdaşlıq haqqında İtaliya, həmçinin Çinlə iki bəyannamə imzalanıb. Mənim bu ölkələrə çoxsaylı səfərlərim nəticəsində bir sıra istiqamətlər üzrə çox gözəl nəticələr əldə edilib”.

İlham Əliyev qeyd edib ki, İtaliya Azərbaycanın bir nömrəli ticarət tərəfdaşıdır, Çin isə əsas ticarət tərəfdaşları sırasında ön sıralarda qərarlaşıb:

“Biz İtaliya ilə xam neft və təbii qaz sahəsində uzunmüddətli əməkdaşlığa bir neçə il bundan əvvəl başlamışıq. Çinlə isə bu yaxınlarda daha çox bərpaolunan enerji layihələrini birgə icra etməyə başlayırıq”.

Prezident əlavə edib ki, aprel ayında Çinə etdiyi dövlət səfəri zamanı bu istiqamətdə vacib razılaşmalar əldə olunub:

“Azərbaycanda hazırda qurulan yeni Günəş elektrik stansiyalarının avadanlıqları əsasən Çin şirkətləri tərəfindən təmin edilir”.